काठमाडौं बैशाख ३,
नेपालसँग सिमा जोडिएको भारतिय राज्य उत्तर प्रदेशका अबकास प्राप्त डिजीपी विक्रम सिंहले हिमालयन बैंक नक्कली भारतीय रुपैयाँको कारोबारमा संलग्न रहेको दाबी गरेपछि बैंकले उक्त आरोपको खण्डन गरेको छ।
हिमालयन बैंकका सूचना अधिकारी सुनिल प्रसाद गोर्खालीले यस्तो दाबीलाई “पूर्ण रूपमा वाहियात, आधारहीन र तथ्यहीन” भन्दै अस्वीकार गरेका छन्।
उनका अनुसार सामाजिक सञ्जाल तथा विभिन्न माध्यममा सार्वजनिक भएको आरोपले बैंकको प्रतिष्ठामाथि अनावश्यक आघात पुर्‍याउने प्रयास भएको छ र यस्ता अभिव्यक्तिमा कुनै प्रमाण तथा आधिकारिक आधार नरहेको बताए।
हालै एक भारतीय पडकास्टमा बोल्दै पूर्व डिजीपी विक्रम सिंहले पाकिस्तानसँग सम्बन्धित नक्कली भारतीय नोटको नेटवर्कमा हिमालयन बैंकको नाम जोड्दै गम्भीर आरोप लगाएका थिए। उक्त अभिव्यक्तिपछि नेपालमा पनि समाचार र सामाजिक सञ्जालमार्फत व्यापक चर्चा भएको थियो।
सूचना अधिकारी गोर्खालीले भने, “बिना प्रमाण कुनै संस्थामाथि यस्ता गम्भीर आरोप लगाउनु गैरजिम्मेवार अभिव्यक्ति हो। हिमालयन बैंक नेपालको प्रतिष्ठित बैंक हो, यसलाई जोडेर गरिएको प्रचार निराधार छ।”